Tërmetet e fuqishme që goditën Turqinë qendrore dhe Sirinë veriperëndimore pak më shumë se një javë më parë janë “fatkeqësia më e keqe natyrore në Rajonin Evropian të OBSH-së për një shekull”, tha Hans Kluge, drejtori rajonal i Organizatës Botërore të Shëndetësisë për Evropën.
“Ne ende po mësojmë për madhësinë e tij. Kostoja e vërtetë e tij nuk dihet ende”, tha Kluge gjatë një konference për shtyp sot.
Rajoni Evropian i OBSH-së përfshin 53 vende evropiane dhe të Azisë Qendrore, përfshirë Turqinë.
Më shumë se 31,000 njerëz janë konfirmuar të vdekur në Turqi dhe gati 5,000 humbën jetën përtej kufirit në Siri, tha ai, duke shtuar se shifrat pritet të rriten më tej. Ai shtoi se 26 milionë njerëz në të dy vendet kanë nevojë për ndihmë humanitare.
OBSH-ja nisi një apel prej 43 milionë dollarësh për të mbështetur reagimin ndaj tërmetit, me gjasa që të vijnë më shumë.
“Unë pres që kjo të paktën të dyfishohet gjatë ditëve në vijim pasi të marrim një vlerësim më të mirë të shkallës masive të kësaj krize dhe nevojave”, tha Kluge.
Me objektet e ujit dhe kanalizimeve të goditura, shqetësimet po rriten për çështjet shëndetësore, duke përfshirë përhapjen e sëmundjeve infektive. Dëmtime të rënda kanë pësuar edhe objektet shëndetësore.
“Sipas autoriteteve turke, rreth 80,000 njerëz janë në spital, duke vënë një tendosje të madhe në sistemin shëndetësor, vetë i dëmtuar rëndë nga fatkeqësia”, tha Kluge.
“Ne kemi iniciuar dislokimin më të madh të ekipeve mjekësore të urgjencës në Rajonin Evropian të OBSH-së në historinë tonë 75-vjeçare”, shtoi ai. Synimi i tyre është të mbështesin objektet mjekësore të dëmtuara, duke u fokusuar në numrin e lartë të të sëmurëve me traumë dhe atyre me lëndime katastrofike
